Татарстан астанасының ең үлкен сауда орталығы – KazanMall-дағы «Лента» дүкенінде «халал» таңбасымен шошқа еті сатылып жатыр. Бүгінде бұл жайт аталған елдің интернет кеңістігінде талқылануда.
Дүкенге келген мұсылман тұтынушы «халал» деп жазылған сөрелердегі еттің құрамын оқығанда олардың шошқа еті екендігін білген. Супермаркет қызметкерлеріне мұсылмандарға тыйым салынған өнімнің «халал» сөресінде тұруы дұрыс еместігін ескерткенімен, діннен хабары аз қызметкерлер оның сөзін құлағына ілмеген.
«Халал шұжық алайын деп етті тексеріп көрсем, шошқа еті екен. Қаламыздағы ірі сауда орталығының ұжымы мұндай бассыздыққа қалай жол беріп отыр?» – деп күйінеді жергілікті тұрғын.
Жалпы харамды халал деп сату оқиғалары бүгінде Ресей мұсылмандарын қатты алаңдатып отыр. Жуырда Орск ет өңдеукомбинаты шығарған «Мусульманские» деп аталатын сарделькалардың құрамынан шошқа ақуызы табылған. Бұл жергілікті мұсылмандардың заңды наразылығын тудырды.
