Токиода өтіп жатқан Олимпиада ойындарында өзінің алғашқы жекпе-жегін өткізген қазақстандық боксшы Абылайхан Жүсіпов америкалық Деланте Джонсонға есе жіберіп, жарысты аяқтады.
Жекпе-жек 1:4 есебімен қарсыластың пайдасына шешілді. Бұл Қазақстанның бокс құрамасындағы алғашқы жеңіліс.
Бұған дейін Сәкен Бибосынов, Серік Теміржанов және Закир Сафиуллин алғашқы жекпе-жектерінде жеңіске жеткен болатын. Бүгін жарыс жолына Василий Левит шығады.
Айта кетсек, Абылайхан Жүсіповтен бүкіл ел үміт күтіп еді. Өйткені, ол халық арасында «қазақтың салмағы» атанып кеткен 69 келіде өнер көрсетеді. Бұған дейінгі 4 олимпиадада бұл салмақта тек қазақтар жеңіске жетіп келді (2004 жылы Афиныда Бахтияр Артаев, 2008 жылы Бейжіңде Бақыт Сәрсекбаев, 2012 жылы Лондонда Серік Сәпиев, 2016 жылы Риода Данияр Елеусінов). Осы игі дәстүрді Абылайхан Жүсіпов үзіп отыр.
