Күндердің күнінде Омар ибн Хаттаб (р.а.) намазды жамағатпен оқу үшін мешітке ерте баруды әдетке айналдырған еді. Содан бір күні мешітке бара жатқанда жанынан балиғатқа толмаған бір бала ебіл-дебіл жүгіріп бара жатады. Сахаба Омар оны тоқтатып:
– Сен қайда асығып бара жатырсың?-дейді. Бала:
– Мешітке намаз оқуға. Мен әлі дәрет алған жоқпын, соны ертерек барып алып, жамағаттың алдынғы қатарында тұрсам деп едім,-дейді елтігіп. Омар таңдана:
– Сен әлі жассың ғой. Саған намаз парыз болған жоқ әлі,-дейді. Сонда әлгі бала:
– Күні кеше менен кішкентай көршімнің баласы дүниеден өткенін өз көзіммен көрдім. Содан өлім айтып келмейтінін біліп, намазды осы бастан оқып, өзімді өлімге дайындап жатырмын,-деген екен.
Жалғас АСХАТҰЛЫ,
дінтанушы
