Сауд Арабия Корольдігінің қолдауымен ел сәулетшілері Мұхаммед (с.ғ.с) пайғамбарымыздың үйін хадистерде айтылғандай үлгіде жасап, мұсылмандар көзайымына ұсынды.
Музей ретінде қолдануға берілген Алла Елшісінің (с.ғ.с) шаңырағын интернеттен 3D арқылы тамашалауға да болады. Шындығында, 1400 жыл бұрын ғұмыр кешкен Мұхаммед (с.ғ.с) хазіреттің баспанасы қай мұсылман үшін де маңызды, салмақты.
Пайғамбар (с.ғ.с) үйін ғаламтордан көріп отырып, расында Оның (с.ғ.с) сахабаларының бізге жеткізген хадистері мен сүннеттер шеңберінде көркемделгенін байқаймыз. Онда шиден тоқылған көрпе, жерге төселген ши кілемдер, дуалда асылған жебе мен садақ, кереует және ағаштан жасалған ыдыс-аяқтар көзге шалынады. Бұл көрме үйі адамзат тәжінің, Алла Елшісінің (с.ғ.с) сондай қарапайым өмір сүргенін, байлық жимағанын, артық дүние ұстамағанын айқындайды. Сондай-ақ Айша анамыздың «Мұхаммед (с.ғ.с) өмірден озғанда үйде бір сынық нан ғана қалып еді» деген сөзін еске түсіреді.
Мынау электронды мекен-жайдан пайғамбарымыздың (с.ғ.с) үйін көруге болады:http://www.tourwrist.com/panos/63181
e-islam.kz
