Жаңалықтар

Астана мешіттері ауызашар жасауда (ФОТО)

Қазақстан мұсылмандары діни басқармасының наиб мүфтиі, «Нұр Астана» орталық мешітінің бас имамы Наурызбай қажы Тағанұлы Астана мешіттеріндегі ауызашар беру үрдісі жайлы айтып берді.

«Елорда мешіттерінде жылдағы дәстүрмен ауызашар беру жалғасады. Бұл – өте сауапты әрі ғибратты іс. Ардақты пайғамбарымыз (с.а.с.): »Ораза ұстаған кісіге ауыз аштырғанға ораза ұстаған кісінің сауабындай сауап жазылады. Бұдан ораза ұстаған кісінің сауабы кемімейді» дейді. Сауабы сансыз Рамазанда мұсылман жамағаты намазда бір қатарда сап түзеуімен қатар, дастархан басында бас қосады. Ауызбіршілік ауадай қажет уақытта – бұл сауабы мен ізгілігі қатар келетін іс. Осындай игілікке атсалысып, демеушілік көрсетіп, шама-шарқынша үлес қосып отырған барша азаматтарға мың алғыс» дейді бас имам. Наурызбай қажы сондай-ақ ораза айында түрлі мекемелерде, атап айтар болсақ, қарттар үйінде, балалар үйінде ауызашар дастархандары жасалатынын да жеткізді.

Орталық мешіттің баспасөз қызметі хабарлағандай, ауыз аштырып, сауапты іске атсалысамын деуші адамдар Ummet.kz сайтының «Ораза» парақшасына кіріп, ауыз аштырушыларға арналған кестедегі бос күндерді алып, игі іске ұйытқы болуына мүмкіндік бар.


Толығырақ

Басқа жаңалықтар

Close