Мысырда халықаралық конференция басталды

    360

    Астана. 19 қаңтар. KAZISLAM – Бүгін Египет елінің астанасы Каир қаласында Уақып министрлігінің ұйымдастыруымен «Мемлекеттің сақталуын қамтамасыз ету үшін ұлттық сәйкестікті қалыптастыру» атты халықаралық конференция өз жұмысын бастады. Бұл туралы ҚМДБ-ның баспасөз қызметі хабарлады. Мысыр президентінің қолдауының аясында өтіп жатқан алқалы жиын жұмысы екі күнге созылмақ.

    Халықаралық конференция жұмысына Бас мүфти Серікбай қажы Ораз тапсырмасымен елімізден арнайы делегация аттанған болатын. ҚМДБ төрағасының бірінші орынбасары, наиб мүфти, Астана қаласының бас имамы Наурызбай қажы Тағанұлы бастаған топ айтулы жиын аясында бірегей баяндамалар жасап, арнайы кездесулер өткізу жоспарланған.

    Бейбарыс бабамыз билік құрған Мысыр жеріндегі халықаралық басқосуға Қазақстанның Египеттегі төтенше және өкілетті елшісі Арман Исағалиев, «Нұр-Мүбәрак» университетінің проректоры Қайрат Құрманбаев және университет ұстазы Сейдмұхаммед Абдунаимдар қатысып, халықаралық деңгейдегі басқосу барысында еліміздегі діни ахуал мен мүфтият жұмысын таныстырмақ.